Árgabeaivve ilut ja hástalusat Gáregasnjárggas ja Anáris
Čállen Ávvirii kolumnna mii heive dán sotnabeaivái. Geassi lea nohkamin ja čakča lea boađi boađi. Luopmoáigi lea farga dušše liegga muitu. Bárbmolottit leat fárregoahtán fas máttás. Ja nu maiddái mu mánnávuođaruovttusge rievdá eallin: oappážagat bearrašiiguin vulget ruovttuideaset. duolva lihttelánat unnot ja gáffe ii šat nu dávjá vuššo.
Árgabeaivi doppe lei dievaslaš. Mánáin lei álo aski, go mun ja isit háliideimme sávnnodit ráfis dahje go mun dušše háliidin giddet hivssega uvssa okto.
Luomu maŋŋá álgá fas árgabeaivi ruovttus Anáris. Sihke vávvá ja guovttejahkásaš stuorra oabbá boahtiba muinna omd. hivssegii. Okto mánáiguin fuobmájin man ollu luomus ledje leamaš veahkkegieđat.
Mánnábearrašat geat leat fárren eará guovlluide, huksejit iežaset doarjjafierpmádaga ja ohcalit luohtehahtti olbmuid birrasis.
Mátkkit ja plánejuvvon árgabeaivi sáhttet dagahit ahte olbmot leat olu okto bearrašiiguin. Dáhpin lea vuolgit guossái dušše juos bovdejuvvo. Dasa in leat áibbas hárjánan. lihkus dasa ii leamaš dárbuge Anáris.
Ovtta beaivve čuojai mu telefovdna ja oidnen ahte siessá geahččalii riŋget. Ledjen bidjamin mánáid nohkkat. Gullen go uksa geavai. Siessá boađedettiin sisa jearai mo mis manná ja áiggui velá čájehit muhtun gággásiid. Munnje šattai hui liekkus dovdu.
Fuomášin ahte in áibbašan makkárge systemáhtalaš “doarjaga”. Mun váillahin mu ráhkis olbmuid ja dan vuoiŋŋasteami mii boahtá das go maiddái unnimus mánát leat oassin árgabeaivválaš servodagas.
Finaimet isida fulkkiid luhtte Gáregasnjárggas. Guovlladeimmet gilidálu Sáivvus. Mun jerren muhtun báikeolbmos gii lei gáfestallamin doppe ”mii dáppe lea oaidninláhkái”. Vástádus lei ahte “geahča speadjalis jus háliidat deaivvadit olbmuiguin.”
Dat lea riekta. Gilli ii leat rabas musea muhto olbmot geat doppe orrot, deaivvadit nubbi nuppiin.
Finaimet siesá luhtte guossis. Čoalkaleimmet uksii ja lei hui lunddolaš beare mannat sisa.
Mii eat álmmuhan siessái ovddalgihtii. Čohkkáimet áigebotta guossis, gáfestalaimet ja hálešteimmet áigeguovdilis áššiid birra. Áigi lei nu hurggihan ahte lei áigi vuolgit ruoktot.
Guossit – sii geat bohtet guossái ja sii geaid luhtte don ieš galledat – dahket árgabeaivvi lihkolažžan. Mun háliidan atnit árvvus dán liegga galledankultuvrra.
